സലാല ഉൾപ്പെടുന്ന ഒമാനിലെ ദോഫാറിൽ ഹലാൽ ടൂറിസം പദ്ധതിയുടെ ഭാഗമായുള്ള സന്നാഹ ശിൽപ്പശാലകൾക്ക് തുടക്കമായി. രാജ്യത്തെ ടൂറിസം മേഖലയ്ക്ക് കൂടുതൽ കരുത്തേകുന്നതിനും ആഗോള തലത്തിലുള്ള ഇസ്ലാമിക് വിനോദസഞ്ചാരികളെ ആകർഷിക്കുന്നതിനുമായി പ്രത്യേക ഹലാൽ റെസ്റ്റോറന്റ് മാനദണ്ഡങ്ങളെക്കുറിച്ച് അവബോധം വളർത്തുകയാണ് പരിപാടിയുടെ പ്രധാന ലക്ഷ്യം. മൂന്ന് ദിവസം നീണ്ടുനിൽക്കുന്ന ശിൽപ്പശാലയ്ക്ക് ടൂറിസം വിഭാഗം അണ്ടർസെക്രട്ടറി അസ്സൻ ബിൻ ഖാസിം അൽ ബുസൈദി നേതൃത്വം നൽകി.
വാണിജ്യ, വ്യവസായ, നിക്ഷേപ പ്രോത്സാഹന മന്ത്രാലയത്തിന്റെ നേതൃത്വത്തിലാണ് ഈ ശിൽപ്പശാല സംഘടിപ്പിച്ചിരിക്കുന്നത്. മേഖലയിൽ പ്രവർത്തിക്കുന്ന സ്ഥാപനങ്ങളുടെ ക്രിയാത്മകത വർദ്ധിപ്പിക്കാനും ടൂറിസം, ഫുഡ് സർവീസ് മേഖലകളിൽ പ്രവർത്തിക്കുന്ന ബിസിനസുകൾക്കും സ്ഥാപനങ്ങൾക്കും ഹലാൽ മാനദണ്ഡങ്ങളെക്കുറിച്ചും അവ നടപ്പിലാക്കുന്നതിനെക്കുറിച്ചും വ്യക്തമായ ധാരണ നൽകാനും ഈ പ്രോഗ്രാം സഹായിക്കും.
ദേശീയ ഹലാൽ സംവിധാനത്തെ ശക്തമായി പിന്തുണയ്ക്കുന്ന ഈ പദ്ധതിയിലൂടെ ആഗോള ഇസ്ലാമിക് സമ്പദ്വ്യവസ്ഥയിൽ നിന്നുള്ള വൻ സാമ്പത്തിക അവസരങ്ങൾ പ്രയോജനപ്പെടുത്താനും ഒമാൻ ലക്ഷ്യമിടുന്നു. മേഖലയിലുള്ളവരുടെ സാങ്കേതിക വിജ്ഞാന ശേഷികൾ വികസിപ്പിച്ചുകൊണ്ട് പുതിയ നിക്ഷേപ സാധ്യതകൾ തുറക്കാനും ആഗോള വിപണിയിലേക്ക് കടന്നുകയറാനും ഈ ശിൽപ്പശാലകൾ സഹായിക്കും.
Content Highlights: Oman has launched a new halal tourism initiative, with preparatory workshops starting in Dhofar. The project aims to develop tourism services and experiences that cater to Muslim travelers while supporting the region’s tourism sector.